D’Fesch erschrecke grüsli ond mache sech wie de Bletz uf ond dervo. En muetige und gwondrige chline Flosschräbs nöcheret sech allerdengs em Krokodil, luegts met sine Chogeliauge onerschrocke a ond frogt met usefordernder Schtemm: «Wem wotsch denn du, bitte schön, imponiere met dim Schwanzklatsche?»

«Niemertem dänk», gets Krokodil mörrisch zur Antwort. «Be nome fruschtriert ond glangwilet. Wett äntlich gärn emol öppis anders erläbe als emmer nome i dem Floss z’schwömme.» De chli Flosschräbs chratzt sech met einere von sine Schäre am Chopf, dänkt agschträngt no und seit: «Weisch du was, Krokodil, mer schtenkts eigentli au. Muess emmer mine Eltere folge ond de gross Brüeder kommandiert mi au schtändig omenand ond macht sech wichtig.»

S’Krokodil het em chline Flosschräbs ufmerksam zueglost ond merkt of eimol, dass es gar nömme eso fruschtriert esch wie no for es paar Minute. Lieslig seits: «Du machsch mer Idrock, chline Flosschräbs. Bes zom hötige Tag händ emmer alli Tier im Floss Angscht gha vor mer ond send gar gflöchtet, wenn si mech gseh händ. Du aber hesch Muet zeigt ond met mer agfange schwätze. Uf eimol merki, dass es d’Einsamkeit esch, wo mi ploget. Wetsch du viellecht min Frönd wärde?» Ongläubig ond erschtunt luegt de chlini Flosschräbs em Krokodil direkt i d’Auge ond gseht, wie ihm en Träne zom lengge Aug us kolleret. Im chline Flosschräbs wirds ganz warm oms Härz. Er fahrt em Krokodil met sinere rächte Schär zart öber d’Schnauze, wie zom d’Träne abtröchne.

Was meinsch, send s’Krokodil ond de chlini Flosschräbs Frönde worde?

Quelle: Jupiterimages