Es isch tüüf Winter gsi und mir händ am Obig im Rangierbahnhof Züri de Güeterzug müesse überneh. De Wätterdienscht hät für de ganzi Tag starki Schneefäll voruusgseit. Pünktlich simmer trotz de grosse Schneeflocke losgfahre. Alles isch guet gange, bis mehr noch Flüele us em Tunnel cho sind und vor üs e riesigi Schneemasse gläge isch. Trotz de Schnällbrämsig vom Grosspapi simmer voll i die Lawine inegfahre. D'Loki isch entgleist, glücklicherwies simmer unverletzt gsi.

Leider het mer zu dere Ziit no kei Handy oder Funk gha, um am nächschte Bahnhof chönne z'brichte, was passiert isch. Also isch üs nüt anders bliebe, als zum nächschte Huus z'laufe. De Grosspapi hät wit obe am Hang es Liecht gseh. Es hät soviel Schnee gha, dass de Grosspapi immer bis zu de Hüft im Schnee versunke isch. Ich sogar bis zum Chopf. Es hät en Ewigkeit duuret, bis mer ändlich bim Buurehof aglangt sind. Mir händ klopfet und Bürin hät ufgmacht. De Grosspapi hät s'ganzi Malheur gschilderet. Er hät sofort dörfe am Bahnhof vo Flüele telefoniere. Mir hät Bürin e heissi Schoggi gmacht und e warmi Wolledecki geh. Was nochher wieter glofe isch, han i nüme mit übercho. I bi nebem Chachelofe igschlofe.

Wo i ufgwache bi, isch mis Mami nebe mir gschtande, um mich abzhole. Zerscht han i gmeint, dass alles nur en Traum gsi isch. Doch mis Mami hät mir no de ganz Rescht vo dem Abentür verzehlt.

Anzeige